यज्ञराज उपाध्याय, टीकापुर । नागरिक उन्मुक्ति पार्टी (नाउपा) संघमा सरकारमा सहभागी नहुने भएको छ । जेष्ठ संस्थापक केन्द्रिय सदस्य दामोदर पण्डित संयोजक रहेको वार्ता समितिले उक्त निर्णय गरेको हो ।
पार्टीको संस्थापक केन्द्रिय समितिको दुई तिहाइ बहुमतको निर्णयले सरकारमा सहभागी हुने वा नहुने भन्ने विषयमा निर्णय गरिएको संयोजक पण्डितले जानकारी दिए । उनले निर्णय गरेको विज्ञप्ति जारी गर्दै केन्द्र सरकारको नयाँ गठबन्धनमा तत्काल सहभागी नभएर प्रतिपक्षमा बस्ने र समर्थन पनि नदिने निर्णय भएको जनाएका छन् ।
यस्तै सुदूरपश्चिम प्रदेश सरकारका विषयमा विभिन्न दलहरुसँग वार्ता समितिले सहकार्य र समन्वय गरि संवाद अघि बढाउने निर्णय भएको छ ।
पार्टीमा अहिले अध्यक्ष रञ्जिता श्रेष्ठ र संरक्षक रेशम चौधरी गरि दुई धार देखिएकाले समिति बनाएर निर्णय गरिएको हो । चौधरी सुदूरपश्चिम सरकारमा सहभागी हुने तर केन्द्रमा नहुने पक्षमा देखिएका थिए भने श्रेष्ठ केन्द्रमा नयाँ गठबन्धनलाई समर्थन गर्ने पक्षमा देखिँदा दुई जनाबीच तिब्र मतभेद देखिएको थियो । रेशम चौधरी र रञ्जिता श्रेष्ठ श्रीमान श्रीमतीसमेत हुन् ।
