मानवहादुर ठकुल्ला । टीकापुर / लकडाउनले गर्दा सडकमा धेरै समयदेखि भोकै र मरणासन्न अवस्थामा पुगेका भुस्याहा कुकुरहरुलाई टीकापुरका सञ्चारकर्मी गणेश क्षेत्रीले स्याहारसुसार लगायत उपचार गर्ने गरेका छन् । टीकापुर नगरपालिका वडा नम्बर ७ का स्थानीयसमेत रहेका क्षेत्रीले लकडाउनका कारण केही खान नपाएर सडकभरी देखिने भुस्याहा कुकुरको लामो समयदेखि स्याहारसुसार तथा सेवा गर्दै आईरहेको बताए ।
टीकापुरको स्थानीय पत्रीका टीकापुर दैनिकका समाचारदाता क्षेत्रीले बिगत दुई बर्ष देखि स्थानीय स्तरमा रहेका भुस्याहा कुकुरको औषधोपचार लगायत दैनिक साँझ बिहान खाना खुवाउने लगायतका काम गरिरहेका छन् । भनिन्छ कुकुर यमराजको दुत हो र कुकुरको वर्षको एकदिन तिहारको समयमा कुकुर तिहार आउदा खोजीखोजी माला र टीका लगायर पुजा पनि गरिन्छ तर आफुले पालनपोषण गर्ने गरेका कुकुरलाई दैनिक रुपमा लगभग पाँच केजी चामलको भात पकाउने गरेको पत्रकार क्षेत्री बताउछन् । बाटोमा भुस्याहा कुकुर देख्ने बितिकै दया लागेर आउने र जति हतारमा भएता पनि उनीहरूलाई बिस्कुट, पाउरोटी खुवाएर मात्र हिड्ने गरेको उनले बताए ।
पत्रकार क्षेत्रीले लम्कीमासमेत ३ वटा भुस्याहा कुकरलाई बिस्कुट वा पाउरोटी खुवाईदिन एक किराना पसललेलाई समयसमयमा हिसाबकिताब गर्ने सर्तमा जिम्मा दिएको बताए । त्यस्तै उनले बिरामी भएका कुकुरलाई जानकी गाउँपालिकाका पशु प्राविधिक मोहन चौधरीको सहयोगमा उपचार गर्ने गरेको, गर्भपती हुन नदिन महिलालाई लगाउने संगिनी सुई लगाइदिने गरेको जानकारी दिए ।
