काठमाडौं । यो वर्ष विजया दशमीको टीका लगाउने शुभ साइत बिहान १०ः१९ मिनेटको लागि जुरेको छ ।
नेपाल पञ्चाङ्ग निर्णायक समितिले कात्तिक १० गते बिहान १०ः१९ मिनेटका लागि यस वर्ष टीकाको शुभ साइतलाई उत्तम मानेको गृह मन्त्रालयले जनाएको छ । यद्यपि उत्तम साइतपछि पूर्णिमाको दिनसम्म टीका लगाउन सकिने उल्लेख छ ।
यो साल देवी विसर्जनको ८ मिनेटमै टीकाको साइत जुरेको पञ्चाङ्ग निर्णायक समितिले जनाएको छ । यो साल घटस्थापनाको दिन चित्रा नक्षत्र परेको हुँदा टीकामा त्यसको असर परेको पञ्चाङ्ग निर्णायक समितिका सचिव सूर्य ढुंगेलले जानकारी दिए ।
अघिल्ला वर्षहरूमा देवी विसर्जन गरेपछि ३० देखि ४५ मिनेटपछि मात्रै टीकाको साइत जुराउने गरिएका थियो ।
त्यस्तै, फूलपाती भित्र्याउनको लागि शुभ साइतको आवश्यकता पर्दैन । षष्ठीको दिन बेललाई निम्ता दिने र सप्तमीको दिन बिहान बेल टिपेर साँझमा बेल पूजा गर्ने विधान रहेको छ ।
त्यस्तै, कात्तिक ७ गते फूलपातीको दिन बिहान ८ ः५६ मिनेटमा तुलजा भवानीको यात्रा र बिहान १०ः१४ मिनेटमा स्थिरासन गर्ने समय तोकिएको छ ।
विजयादशमीको दिन तुलजा भवानीको यात्रा बिहान ८ ः४७ मिनेटको लागि तोकिएको छ भने देवी विसर्जनको साइत बिहान १०ः११ मिनेटको लागि तोकेको छ ।
