टीकापुर । टीकापुरक्षेत्रका सामाजिक अगुवा मोहनबहादुर रावलको ९० वर्षको उमेरमा निधन भएको छ । उनको टीकापुर नगरपालिका–१ ब्लक नं ए स्थित आफ्नै निवासमा सोमबार निधन भएको हो ।
जीवनको उत्तराद्र्धमा समेत सामाजिक काममा निकै सक्रिय रावलको कोरोना संक्रमणबाट निधन भएको हो । मृतक रावलको कार्तिक १७ गते स्वाब संकलन गरिएकोमा २० गते कोरोना संक्रमण भएको रिपोर्ट आएको थियो । होमआइसोलेसनमा रहेका रावललाई आइतबार राति स्वास प्रस्वासमा निकै समस्या भएको थियो ।
जीवनको लामो समय सरकारी सेवामा रहेका रावलले अवकाश प्राप्त समय सामाजिक काममा बिताए । उनले टीकापुर नगरपालिका–७ मा रहेको वन क्षेत्रलाई संरक्षण थाले । उनको नेतृत्वमा संरक्षण थालिएको सत्तीकर्णाली सामुदायिक वन संरक्षणका हिसाबले नेपालकै पहिलो सामुदायिक वन हो । उनी लामो समय सो सामुदायिक वनको अध्यक्ष रहेका थिए ।
उनले आफ्नै पहलमा टीकापुरमा बृद्ध सेवा समाजको स्थापना गरे । उनी सो संस्थाका वर्तमान अध्यक्ष समेत हुन । उनी सामुदायिक सहकारीका संस्थापक अध्यक्ष, नेपाल रेडक्रस सोसाइटी नारायणपुरका संस्थापक, भानु पुस्तकालयका आजीवन सदस्य समेत रहेका थिए ।
रावलले आफ्नो सम्पूर्ण सेवा समाजकालागि समर्पण गरेका थिए भने उनि थुर्पै संघसंस्थामा अबद्ध थिए ।
