नेपालगञ्ज । नेपालगञ्जमा कारले ठक्करबाट ३ जना पैदलयात्रीको ज्यान गएको छ ।
बिपी चोक नजिक आइतबार राति कारले ठक्कर दिंदा तीन जना पैदलयात्रीको ज्यान गएको हो ।
प्रदेश ३–०१–२३ च ८४८१ नम्बरको कारले ठक्कर दिंदा नेपालगञ्ज उपमहानगरपालिका वडा नं. ११ निवासी ६५ वर्षीया समिना इद्रिसी, पाँच वर्षीय कसिम इद्रिसी र अलि इद्रिसीको ज्यान गएको बाँके प्रहरीले जनाएको छ ।
प्रहरीका अनुसार सडकमा हिँडिरहेका तीनै जनालाई कारले ठक्कर दिएको हो । कारको ठक्करबाट गम्भीर घाइते उनीहरुलाई त्यही कारमा राखेर चालकले शिक्षण अस्पताल नेपालगञ्ज पुर्याएका थिए । १५ मिनेटपछि नै उनीहरुको मृत्यु भएको अस्पतालले जनाएको हो ।
कार चालक नेपालगञ्ज उपमहानगरपालिका वडा नं. १० निवासी २८ वर्षीय इन्द्रबहादुर थापालाई प्रहरीले नियन्त्रणमा लिएर अनुसन्धान थालेको जनाइएको छ ।
