टीकापुर । सुदूरपश्चिममा ३७ हजार बढी नयाँ मतदाता थपिएका छन् । प्रदेशका ९ वटै जिल्लामा गरी ३७ हजार २ सय ६१ नयाँ मतदाता थपिएको प्रदेश निर्वाचन कार्यालय धनगढीले बताएको छ ।
प्रतिनिधिसभा र प्रदेश सभा सदस्य निर्वाचनलाई लक्षित गरी मुलुकभर मतदाता नामावली सङ्कलन तथा अद्यावधिक कार्यबाट उक्त नयाँ मतदाता थपिएको प्रदेश निर्वाचन कार्यालयका निमित्त प्रमुख प्रेमराज भट्टले बताए ।
उनका अनुसार कैलालीमा ११ हजार ४ सय ३० नयाँ मतदाता थपिएका छन्, भने कञ्चनपुरमा ९ हजार ८ सय २८, बाजुरामा १ हजार ३ सय ६४ जना नयाँ मतदाता थपिएका हुन् ।
यस्तै अछाममा ४ हजार ८०, डोटीमा २ हजार १ सय ७२, बझाङमा १ हजार ६ सय ५९ नयाँ मतदाता थपिएका हुन । डडेल्धुरामा २ हजार २ सय ५८, बैतडीमा २ हजार ८ सय ६ र दार्चुलामा १ हजार ६ सय ६४ नयाँ मतदाता थपिएका हुन् ।
