धनगढी । सुदूरपश्चिम प्रदेशमा करिब साढे ११ हजार म्यादी प्रहरी खटाइने भएका छन । अगामी मंसिर ४ मा हुने प्रतिनिधि सभा र प्रदेश सभा निर्वाचनलाई ती म्यादी प्रहरी खटाइने भएको हो ।
प्रदेशका नौ वटै जिल्लाको प्रत्येक प्रतिनिधि तथा प्रदेश सभाको चुनाव सुरक्षाका लागि ११ हजार ५ सया ७८ जना म्यादी प्रहरी खटाइने सुदूरपश्चिम प्रदेश प्रहरी कार्यालय कैलालीले जानकारी दिएको छ ।
प्रहरीका अनुसार डोटीमा नौ सय ५३, अछाममा एक हजार दुई सय ६८,बाजुरामा सात सय ४९, डडेल्धुरामा नौ सय ३७ जना म्यादी प्रहरी खटाइने छन ।
यस्तै बैतडीमा एक हजार एक सय ९१, दार्चुलामा आठ सय २९, बझाङमा एक हजार एक सय ८८, कैलालीमा दुई हजार आठ सय १२ र कञ्चनपुरमा एक हजार छ सय ३२ जना म्यादी प्रहरी खटाउने कोटा छुट्याइएको छ ।
गत भदौ ३० गतेसम्म म्यादी प्रहरीको लागि खुलेको भर्नामा सुदूरपश्चिम प्रदेशमा २४ हजार ५ सय १६ जनाले आवेदन दिएका थिए । त्यसबाट ११ हजार ५ सय ७८ जना छनोट गरिने बताए ।
