रोशन पौडेल
घोडाघोडी । विश्व रामसार सूचीमा सूचीकृत कैलालीको घोडाघोडी ताल क्षेत्रमा तिहार नजिकिएसँगै पर्यटकको चहलपहल बडेको छ । पछिल्लो समय पर्यटकको चहलपहल बढेसँगै पर्यटन प्रवर्द्धन हुन थालेको छ ।
घोडाघोडी ताल क्षेत्रमा अवलोकन गर्न टिकटको व्यवस्था गरिएको छ । १० रुपियाँ प्रतिव्यक्तिका दरले टिकट शुल्क लिएपछि घोडाघोडी ताल क्षेत्रमा प्रवेश पाउने व्यवस्था गरिएको छ । पछिल्लो समय तिहार नजिकिएसँगै घोडाघोडी ताल क्षेत्रमा पर्यटकको सङ्ख्या निकै वृद्धि भएको छ ।
साउन, भदौ र असोज महिनामा मात्र दश हजार बढी पर्यटकले घोडाघोडी तालको अवलोकन गरेका छन् भने, दसैँको यताका दिनमा मात्र दश हजार बढी पर्यटकले घोडाघोडीको अवलोकन गरेका छन् ।
वार्षिक रूपमा ८० हजार बढी पर्यटक घोडाघोडी भित्रिने गरेको भए पनि यो वर्ष भने एक लाख बढी पर्यटक घोडाघोडी घुम्न आउने अनुमान गरिएको छ ।
पछिल्लो समय घोडाघोडीमा पर्यटक आकर्षणका लागि प्रवेश द्वारमा पार्क निर्माण गरी चिटिक्क पारिनुका साथ यस क्षेत्रमा मगर तामाङ, नेवार, थारु लगायतका पोसाकमा तस्बिर लिन र घोडा सवार गर्न पाउने व्यवस्था भएपछि घोडाघोडी ताल क्षेत्रमा आन्तरिक पर्यटकको गन्तव्य बन्नुका साथै पर्यटकको सङ्ख्यामा वृद्धि भएको छ ।
विभिन्न जातजाति समुदायको पोसाक भाडामा दिएर यहाँका स्थानीयले राम्रै आम्दानी गरेका छन् । व्यवसायी सरस्वती शाहले एक घण्टाको लागि पर्यटकको रोजाइअनुसारको पोसाक एक सय रुपियाँमा भाडामा दिने गरेको बताउनुभयो ।
तिहार पर्वसँगै पर्यटकको सङ्ख्यामा वृद्धि भएको स्थानीय व्यवसायीको भनाइ छ । उहाँले पहिला दैनिक दुई तीन हजार पोसाक भाडाबाट आम्दानी हुने गरेकोमा पर्यटकको सङ्ख्या बढेसँगै दैनिक पाँच–छ हजार पोसाक भाडाबाट आम्दानी हुने गरेको बताउनुभयो ।
घोडाघोडीमा पर्यटकको सङ्ख्या बढेसँगै यहाँ आउने पर्यटकको तस्बिर खिचेर स्थानीय युवाहरूले राम्रै आम्दानी गर्न थालेका छन् । स्थानीय विमला पौडेलले बेरोजगार भएर बरालिएका स्थानीय युवाले तस्बिर खिचेर राम्रै आम्दानी गर्ने गरेको बताउनुभयो ।
पहिला पाँच जना मात्र तस्बिर खिच्ने युवाहरू थिए भने अहिले पर्यटकको सङ्ख्या बढ्दै गएपछि घोडाघोडी क्षेत्रमा १६ जना स्थानीय युवाहरूले तस्बिर खिच्ने काम गर्छन् । एउटा तस्बिर खिचेर मोबाइलमा पठाएको २० रुपियाँको दरले लिने गरिन्छ । घोडाघोडीमा पर्यटकको सङ्ख्यामा वृद्धि भएसँगै स्थानीयमा रोजगारी पनि सिर्जना भएको छ । केहीले घोडाघोडी क्षेत्रमा पसल सञ्चालन गरी मनग्य आम्दानी गर्दै आइरहेका छन् ।
