टीकापुर । फ्यामिली ग्रुप अफ इण्डष्ट्रिज कम्पनी प्रा.लिले स्थानीय उत्पादन गाउँ गाउँमा पठाउने भएको छ । टीकापुर र जानकीका ग्राहकलाई लक्षित गरेर स्थापित कम्पनीले स्थानीय स्तरमै विभिन्न वस्तुको उत्पादन गरिरहेको छ ।
कम्पनीले सोमबार टीकापुर नगरपालिका-१ मुनुवा रोडमा एक कार्यक्रमका बीच प्रधान कार्यालय समुद्घाटन गर्दै सेवा विस्तारसमेत गरेको जनाएको हो । कम्पनीका संचालक प्रेम साउदले बेरोजगारी र आर्थिक मन्दीलाई मध्यनजर गर्दै स्थानीय स्तरमा रोजगारी सिर्जना गर्न विभिन्न सामानको उत्पादन गरेर बिक्री वितरण गरिरहेको बताए । उनका अनुसार अहिलेसम्म ६ प्रकारका सामान उत्पादन गरिएको छ । जसमा लिक्विड डिटर्जेन्ट, पाउडर डिटर्जेन्ट, लिक्विड टोइलेट क्लिनर, लिक्विड भेहिकल वाश, लिक्विड ग्लास क्लिनर रहेका छन् । अब केही महिनामै थप ४ प्रकारका सामानहरुको पनि उत्पादन गरिने साउदको भनाई छ ।
संचालक साउदले जानकी गाउँपालिका र टीकापुर नगरपालिकाका बस्ती बस्तीमा आफ्ना उत्पादन पठाउने गरेको बताएका छन् । उनले अहिलेसम्म पाँच हजार ग्राहक बनिसकेको भन्दै १७ जनाले रोजगारीसमेत पाएको बताए ।
पाँच लाख चुक्ता लगानीमा सुरु भएको कम्पनीले जानकी गाउँपालिका-६ धर्मापुर कटानमा विभिन्न वस्तुको उत्पादन गरिरहेको छ । रासायनिक पदार्थ र आयुर्वेदिक जडिबुटी बराबर मात्रामा मिसाएर उत्पादित वस्तु नागरिकको दैनिक काम काजमा प्रयोग हुने भएकाले ग्रामीण भेगमा बढी पठाएको र धेरैले रुचाइरहेको संचालक साउदले जानकारी दिए । उनले अहिले यहाँ मात्र उत्पादन बिक्री वितरण गरिरहेकोमा निकट भविष्यमा सुदूरपश्चिम भरी आफ्ना उत्पादन पठाउने लक्ष्य रहेकोसमेत बताए ।
कम्पनीका संचालक प्रेम साउँदको सभाध्यक्षतामा गरिएको कार्यक्रमको प्रमुख अतिथी टीकापुर उद्योग वाणिज्य संघका अध्यक्ष चक्रपाणी सापकोटा रहेका थिए ।
कार्यक्रममा बोल्दै सापकोटाले अहिले युवाहरु विदेशी रहेको अवस्थामा स्थानीय स्तरमै उत्पादन गरिनु निकै खुशीको कुरा भएको बताए । उनले यस कम्पनीका उत्पादन आफुले पनि प्रयोग गर्ने गरेको भन्दै निकै राम्रो लागेको जनाए ।
कम्पनीका वरिष्ठ कर्मचारी रेखा भुलले स्वागत गरेको उक्त उद्घाटन समारोहको संचालन अम्रिका मल्ल र प्रदिप रिमालले गरेका थिए । कार्यक्रममा खडक सिंह नगार्जीले शुभकामना मन्तव्य राखेका थिए ।
