टीकापुर । कैलालीबाट प्रहरीले लागू औषध सहित ३ जना पक्राउ परेका छन् । धनगढी उपमहानगरपालिका – ८ नालापानीबाट ४५ वर्षीय सुरज चौधरी पक्राउ परेका छन् ।
उनको साथबाट ६ ग्राम ४० मिलिग्राम लागू औषध खैरो हेरोइन बरामद गरिएको प्रदेश प्रहरी कार्यालय धनगढीले जनाएको छ । उनलाई लागू औषध नियन्त्रण ब्युरो शाखा कार्यालय महेन्द्रनगर र अस्थायी प्रहरी पोस्ट मनेहराबाट खटिएको संयुक्त प्रहरी टोलीले नियन्त्रणमा लिएको थियो ।
यस्तै टीकापुर नगरपालिका – ९ खक्रौला चेकपोस्ट नजिक सडक खण्डबाट टीकापुर नगरपालिका ब्लक नम्बर १७ का २३ वर्षीय खगेन्द्र साउद र टीकापुर नगरपालिका – ५ नुक्लिपुरका २६ वर्षीय दीपक विष्ट पक्राउ परेका छन् ।
उनीहरूको साथबाट ५६० मिलिग्राम लागू औषध खैरो हेरोइन बरामद गरिएको प्रहरीले जनाएको छ । दुवै जनालाई इलाका प्रहरी कार्यालय टीकापुर र प्रहरी चौकी कालाकुण्डाबाट खटिएको संयुक्त प्रहरी टोलीले नियन्त्रणमा लिएको थियो ।
