हुम्ला । हिमाली जिल्ला हुम्लामा फल्ने कालो मार्सी चामलको मूल्य बढेर २५० रुपैयाँ प्रतिकेजी पुगेको छ । यो चामल प्रतिक्विन्टल २५ हजार रुपियाँ पुगेको छ । कालो मार्सी चामलको माग बढेपछि मूल्य वृद्धि भएको हो ।
एक क्विन्टल मार्सी चामल किनेकी सिमकोट बजारकी मधु बस्नेतले प्रतिकेजी २५० रुपियाँ परेको बताईन । कालो मार्सी चामल मधुमेहका बिरामीका लागि बढी फाइदाजनक हुने भएकाले यसको माग बढ्दै गएकाले पनि महँगो परेको उनको भनाइ छ । गत वर्षसम्म प्रतिकेजी २२० रुपियाँ पर्ने मार्सी चामलको मूल्य यस वर्ष ३० रुपियाँ वृद्धि भएको हो ।
दक्षिणी हुम्लाबाट २२ क्विन्टल मार्सी चामल बाख्रामा ढुवानी गरेर ल्याएका अदानचुली गाउँपालिका–२, मकै गाउँका दत्त बुढा सबै चामल प्रतिक्विन्टल २५ हजारमा बिक्री भएको बताउँछन ।
