टीकापुर । मोहना नदीमा मृत भेटिएका प्रहरी जवान रामबहादुर साउदको पनि विभत्स हत्या भएको प्रहरीले जनाएको छ ।
साउदको घाटीमा धारिलो हतियार प्रहार गरी हत्या गरिएको प्रहरीले जनाएको छ ।
साउँदको धारिलो हतियार प्रयोग गरी हत्या गरेको देखिएको सुदूरपश्चिम प्रदेश प्रहरी कार्यालयका प्रवक्ता प्रहरी वरिष्ठ उपरिक्षक मुकेशकुमार सिहले जानकारी दिए ।
गत शनिबार राती हत्या गरिएका असइ बिकसँगै साउद पनि नियमित गस्तीमा खटिएका थिए ।
यस्तै हत्या गरिएका असइको हराएको पेस्तोल पनि नदीमै भेटिएको जनाइएको छ ।
असइ बिक आइतबार बिहान नेपाल–भारत सीमा स्थित धनगढी उपमहानगरपालिका वडा नम्बर १० को मोहना नदीमा हत्या गरेको अवस्थामा फेला परेका थिए ।
बिक भेटिएको स्थानदेखि २ सय मिटर टाढा साउदको शव आज बिहान भेटिएको हो । यसैबीच दुवै प्रहरीको हत्यामा संलग्न अपराधिक गिरोहलाई प्रहरीले पक्राउ गरेको छ ।
जिल्ला प्रहरी कार्यालय स्रोतका अनुसार पक्राउ परेका १६ जना मध्ये केहीले हत्या गरेको स्वीकार गरिसकेका छन् भने केही व्यक्तिहरु अझै भागिरहेकाले खोजी भइरहेको छ ।
उनीहरुले तस्करीको सामान बरामद गर्न खोजेपछि प्रहरीमाथि हमला गरी हत्या गरेको प्रहरी समक्ष बयानका क्रममा स्वीकार गरेको स्रोतको भनाई छ ।
