सुदिप बिक ।
टीकापुर । ईलाका प्रहरी कार्यालय टीकापुरले शुक्रबार ५५ हजार बराबरको अबैध सामान नियन्त्रण लिएको छ ।
ईलाका प्रहरी कार्यालय टीकापुरका प्रहरी सहायक निरिक्षक टंक बहादुर बिकको कमाण्डमा खटिएको ५ जनाको टोलीले सो सामान नियन्त्रणमा लिएको हो ।
शुक्रबार बिहान करिब ८ बजेको समयमा कैलालीको टीकापुर नगरपालिका वडा न. ७ डिब्बीपुर बाट अबैध रुपमा भन्सार छली ल्याई लुकाई छिपाई राखिएको अवस्थामा २१ हजार बराबरको पवन सुर्ति ३ सय पोका, २८ हजार ८ सय बराबरको ४० केजी प्लाष्टिक झिल्ली, ४ हजार ८ सय बराबरको डवल स्क्रिन टफि ८० पोका र ६ सय बराबरको पतान्जलि टफि १५ पिस गरि जम्मा अनुमानित ५५ हजार बराबरको अबैध सामान नियन्त्रणमा लिएको इलाका प्रहरी कार्यालय टीकापुरका प्रहरी निरीक्षक अरुण बमले मलवारालाई जानकारी दिए ।
बमले उक्त ५५ हजार बराबरको अबैध सामान आवश्यक कारवाहीको लागी सत्ति भन्सार कार्यालय खक्रौला पठाएको समेत जानकारी दिए ।
लकडाउनले गर्दा सत्ती भन्सार नाका नखोलेको भए पनि सुरक्षाकर्मीहरुलाई छलेर अन्य ठाउँ बाट अबैध रुपमा रातारात सामानहरु नेपाल आउने गरेको स्थानियहरुले गुनासो गरेपछि टीकापुर प्रहरीले सिमाना तर्फ निगरानी बढाएको छ ।
नेपाल भारत सीमानामा नेपाल प्रहरी र शसस्त्र प्रहरीको बाक्लो उपस्थिती छ । तर सीमानाबाट सामान भित्रिनुले सीमानामा परिचालन प्रहरीको सीमा तस्करसंग मित्रताको गाढा सम्बन्ध रहेको स्थानिय बासिन्दाको दावी छ ।
