मलवारा समाचार
अछाम, १६ साउन÷ अछाममा एकैदिन फरकफरक स्थानमा शुक्रबार भालुको आक्रमण भएको छ । भालुको आक्रमणबाट तीन जना घाइते भएका छन्। रामारोशन गाउँपालिका वडा नं. ६ भाटाकाटीयाको तुर्सानी समुदायिक वनमा भालुले आक्रमणमा भाटाकाटियाका ३० वर्षीय दानबहादुर साउद र ३८ वर्षीय तुल साउद घाइते भएका छन्।
दिउँसो घाँस दाउरा काट्ने क्रममा भालुले आक्रमण गरेको हो । उनीहरुको शरिरमा चोट गम्भीर चोट लागेको जिल्ला प्रहरी कार्यालय अछाम मंगलसेनले जनाएको छ। प्रहरीका अनुसार घाइते दुवैलाई प्रहरी चौकी सान्तडाबाट गएको टोलीले उद्धार गरी बयलपाटा अस्पताल पठाएको छ ।
यस्तै रामारोशन गाउँपालिका –५ छडिखोलाको जंगलमा घाँस, दाउरा काटने क्रममा भालुले ५५ वर्षीय भैरे बटलामाथि पनि आक्रमण गरेको स्थानियले जानकारी दिएका छन। उनको अवस्था समेत गम्भिर रहेको र प्रहरी चौकी सान्तडाबाट गएको टोलीले उद्धार गरी बयलपाटा अस्पताल पठाएको जनाइएको छ ।
