धनगढी । धनगढीको मायामेट्रो अस्पतालमा उपचारको क्रममा मृत्यु भएकी बाटुली धामीको शव आफन्तले बुझेका छन् । बझाङकी ४२ वर्षीया बाटुली धामीको उपचारका क्रममा मंगलबार बिहान ५ बजेको समयमा मृत्यु भएको थियो ।
अस्पताल स्रोतका अनुसार भर्खर आफन्तले धामीको शव बुझेका हुन् । उपचारमा चिकित्सकको लापरबाही नभएको र अपरेसनपछि रगत अत्यधिक बग्दै गएकाले उनको मृत्यु भएको अस्पतालको दाबी छ ।
यस्तै सोही प्रकरणले अस्पतालमा आज तनाव भएकोमा आफन्त र अस्पतालबीच सहमति भएपछि शव बुझिएको छ । अस्पतालले मृतकको उपचार खर्चसमेत मिनाहा गर्ने र मृतकका सन्तानलाई निशुल्क उपचार गरिदिने सहमति गरेको बताइएको छ।
उनका आफन्तले चिकित्सकको लापरबाहीका कारण मृत्यु भएको आरोप लगाएका थिए । अस्पतालमा तनाव भएपछि प्रहरी परिचालन समेत गरिएको थियो । अहिले शवलाई पोस्टमार्टमका लागि सेती अस्पतालमा पठाइएको छ।
