यज्ञराज उपाध्याय, टीकापुर । सत्ती कर्णाली सामुदायिक वन नेपालकै सबैभन्दा बढी बेत उत्पादन हुने वन हो । टीकापुर नगरपालिका-७ मा अवस्थित यस सामुदायिक वनको मुख्य आम्दानीको श्रोत पनि बेत नै हो । चारवटा प्लट छुट्याएर सत्ती कर्णाली सामुदायिक वनमा बेत उत्पादन गरिदै आएको छ । एक वर्षमा एक प्लटको मात्र बेत काटेर बजारमा पठाउने यो सामुदायिक वनले ठूलो क्षेत्रफलमा बेत उत्पादन गरिरहेको छ ।
वनका कार्यालय सचिव मिनबहादुर ठकुल्लाले १४७ हेक्टर क्षेत्रफलमा पानी बेत उत्पादन भइरहेको बताए । उनले चार वटा प्लट छुट्याएर बेत उत्पादन भइरहेको बताउदै वर्षमा एक प्लट मात्र बेत काट्ने गरेको बताए । यो वर्ष चार नं। प्लटको बेत काट्ने काम भइरहेको ठकुल्लाले जानकारी दिए ।
उनले हालसम्म दुई हजार क्विन्टल काचो बेत काटेर सुकाउन राखेको बताउदै सुकिसकेपछी उक्त बेत सात सय क्विन्टल भएको बताए । चार नं। प्लटमा ६ हजार ४४६ क्विन्टल काचो काचो बेत उत्पादन हुने ठकुल्लाले जानकारी दिए । बेत काटेर सुकाउन राखेपछि ६५ प्रतिशतसम्म सुक्ने गरेको समेत उनले जानकारी दिए ।
सामुदायिक वनमा उत्पादन हुने बेत मध्ये अधिकांश भारतीय बजारमा निर्यात हुने गर्दछ । बेतका विभिन्न सामाग्री बनाउन केही मात्रामा मात्रै स्थानीय बजारमा जाने भए पनि धेरै भारतमा निर्यात हुने गरेको छ ।
सामुदायिक वनका अध्यक्ष जितराम चौधरीले यो वन बेत उत्पादनका हिसाबले नेपालमै पहिलो सामुदायिक वन भएको बताए । उनले फाट्टफुट्ट केही मात्रामा अन्यत्र बेत उत्पादन हुने गरे पनि प्राकृतिक रुपमा र ठूलो क्षेत्रफलमा यहाँ मात्र बेत उत्पादन हुने गरेको दाबी गरे । अध्यक्ष चौधरीले वनले बेतबाट राम्रै आम्दानी गरिरहेको भन्दै यसैबाट केही स्थानीयले रोजगारी पनि पाएको बताए ।
